प्रधानमन्त्री नेपाल कोपनहेगन सम्मेलनमा सहभागी हुन डेनमार्कतर्फ प्रस्थान

काठमाडौं । प्रधानमन्त्री माधव नेपाल जलवायु परिवर्तनसम्बन्धी सम्मेलनमा सहभागी हुन डेनमार्कको कोपनहेगनतर्फ प्रस्थान गरेका छन् ।

प्रधानमन्त्री नेपालसहित ३८ सदस्यीय टोली सोमबार थाई एयरको विमानबाट डेनमार्कतर्फ लागेको हो । प्रधानमन्त्रीका साथ पत्नी गायत्री, राजनीतिक सल्लाहकार रघुजी पन्त, परराष्ट्र सल्लाहकार राजन भट्टराई र मुख्यसचिव माधवप्रसाद घिमिरेलगायत ६ सभासद् पनि टोलीमा संलग्न छन् । प्रधानमन्त्री नेपालले कोपनहेगन सम्मेलनमा बुधबार सम्बोधन गर्ने कार्यक्रम छ ।

कोपनहेगन जानुअघि विमानस्थलमा सञ्चारकर्मीसँग प्रधानमन्त्री नेपालले सम्मेलनमा आफूले सगरमाथामा बसेको मन्त्रिपरिषद् बैठकको निर्णय प्रस्तुत गर्ने जानकारी दिए । डेनमार्क बसाइका क्रममा उनले विभिन्न देशका राष्ट्र र सरकार प्रमुखसँग आपसी हितका विषयमा पनि छलफल गर्ने छन् ।